Archive for October 19th, 2007

પ્રભુ ની યાદ આવે છે

પ્રભુ ની યાદ આવે છે

મને હર વાતમાં જાણે પ્રભુની યાદ આવે છે
ગણાવું શું શું કે જેમાં પ્રભુની યાદ આવે છે

મને આકાશ જોઈને, જોઈને તારલાનું ઝુંડ
સમજ પડતી નથી તો પણ્ પ્રભુની યાદ આવે છે

ફૂલોમાં રંગ અને ખુશ્બુ ભરેછે કોણ શી રીતે
નજર પડતાં ફૂલો ઉપર પ્રભુની યાદ આવે છે

મધુરાં સ્મિત બાળકનાં અને જીજ્ઞાશા ચંચળતા
બધી નિર્દોષ હરકતમાં પ્રભુની યાદ આવે છે

આ પ્રુથ્વિને વધુ સુંદર આ ચંદરમા બનાવે છે
મને આ ચાંદની જોઈ પ્રભુની યાદ આવે છે

વગાડે વાંસળી કોઈ તો મન ડોલી ઉઠે મારું
સુરોંની મિઠી લહેરોમાં પ્રભુની યાદ આવે છે

અતિવૃષ્ટિ અનાવૃષ્ટિ કે ધરતીકંપ કે દાવાનળ
બધી બરબાદી જોઈ ને પ્રભુની યાદ આવે છે

‘સૂફી’ને રંજ છે પાપો કર્યાં તેનો ઘણો દિલમાં
કરી લેવા હવે તોબા પ્રભુની યાદ આવે છે

‘સુફી’ પરમાર

2 Comments »

પ્રેમ પેદા કર

પ્રેમ પેદા કર

જીવનભર સુખ અને દુઃખમાં કરી મેં બંદગી તારી
કદી ઈશ્વર, કદી અલ્લાહ કહી માળા જપી તારી

વસે છે દિલમાં તું મારા અને દુનિયા ની રજ રજ માં
નજર જ્યાં જ્યાં પડી ત્યાં ત્યાં મેં જોઈ છે છબી તારી

આ દોરી શ્વાસની મારી અને આ દિલના ધબકારા
મેં આ ઘટમાળમાં જોયું, કરામત છે ભરી તારી

ગયો મંદિરોમાં ને હું ગયો મસ્જિદોમાં ભગવંત
ગયો ગુરુદ્વારા, ગિરજામાં, કરી ત્યાં બંદગી તારી

પહાડો જંગલો દરિયા, સરોવર વાદળો રણમાં
નઝારા જ્યાં મેં જોયા ત્યાં, કરી છે આરતી તારી

મળી છે પ્રેમમાં તારા નવી દ્રષ્ટિ પ્રભુ પ્યારા
હરેક સતસંગમાં તેથી મળી મોજુદગી તારી

પુજારી કે નમાજી ના દિલોમાં પ્રેમ પેદા કર
કે ધર્મોમાં પૂરી થઈ જાય, જ્યાં જ્યાં છે કમી તારી

પ્રભુ તરબોળ તારા ઈશ્કમાં છે આતમા મારો
હવે હરપળ ‘સૂફી’ કરતો રહે છે બંદગી તારી

‘સૂફી’ પરમાર

No Comments »

હૃદય નો સાથ રાખું છું

હૃદય નો સાથ રાખું છું

હું માટી નો બનેલો છું, હમેશાં યાદ રાખું છું
અને આ પ્રાણ દિવ્ય છે, એવા સંસ્કાર રાખું છું

બહુ અલ્પ સમય માટે છે મારી યાત્રા જગની
ફરી માટી બનીશ જલ્દી તે હૈયે વાત રાખું છું

હૃદય ની મારી ધડકન માં જે વાતો છે નિરાલી છે
હૃદય ની વાત સાંભળવા, હૃદય નો સાથ રાખું છું

નથી જગમાં કોઈ પણ સર્વજ્ઞાનિ, સર્વગુંણસંપન્ન
દુઃખે ના દિલ કોઈ નું, હું હરેકની વાત રાખું છું

સભર છે દિલ દયા થી પ્રેમ થી એવો અગર છું ભક્ત
પ્રભુ ચાહશે મને, એ વાત પર વિશ્વાસ રાખું છું

પ્રભુના પ્રેમ માં ભીનો થયો છે આતમા મારો
કરું છું વાત જ્યારે હું હૃદય પર હાથ રાખુંછું

કોઈ અલ્લાહ કહે, ઈશ્વર કહે કોઈ, ખુદા ભગવાન
હું મલિકના બઘાં નામો ના પ્રત્યે પ્યાર રાખું છું

‘સૂફી’ ને લઈ જવો છે આતમા નિર્મળ પ્રભુ પાસે
કહે છે, આતમા ને માંજી માંજી સાફ રાખું છું

‘સૂફી’ પરમાર

No Comments »

Type in
Details available only for Indian languages
Settings Settings reset
Help
Indian language typing help
View Detailed Help